Stars yapania kuisambaratisha Lesotho

Timu ya taifa ya mpira wa miguu ya Tanzania, Taifa stars imeanza kujifua kwa mazoezi mazito usiku wa jana mara tu baada ya kufika salama mjini Alexandria, nchini Misri kwa ajili ya kuweka kambi ya wiki moja.

Kocha mkuu wa Taifa Stars Salum Mayanga aliyeshika kiuno akiwa na viongozi wa TFF wakikagua uwanja wa mazoezi hapo jana nchini Misri.

Akizungumza mara baada ya mazoezi hayo Kocha mkuu wa timu hiyo Salum Mayanga amesema walirizika na viwanja vya mazoezi baada ya kuvikagua jana na moja kwa moja jioni hiyo kuanza progaramu ya mazoezi.

Kocha Mayanga ambaye alipewa majukumu ya kuifundisha timu hiyo mapema Januari, mwaka huu, amesema: "Programu ya mazoezi kwa timu itakuwa zaidi usiku kwa sababu mchezo wetu dhidi ya Lesotho pia utachezwa usiku, hii ni kutokana na mfungo wa mwezi mtukufu wa Ramadhan ingawa wakati mwingine mazoezi yatafanyika asubuhi na jioni."

Taifa Stars inayopiga kambi nchini Misri, inajiandaa na mchezo dhidi ya Lesotho utakaofanyika Juni 10, 2017 kwenye Uwanja wa Azam Complex ulioko Chamazi nje kidogo ya jiji la Dar es Salaam. Mchezo huo umepangwa kuanza saa 2.00 usiku.
Mchezo dhidi ya Lesotho ni muhimu kwa Tanzania ikiwa ni mechi ya kwanza kwa Taifa Stars katika Kundi 'L' kuwania nafasi muhimu ya kucheza fainali za Kombe la Mataifa ya Afrika (AFCON) za mwaka 2019 zitakazofanyika nchini Cameroon.
Mbali ya Lesotho na Tanzania, mataifa mengine katika Kundi 'L' ni Uganda na Cape Verde ambao pia wikiendi ya Juni 9, 10 na 11, mwaka huu watakuwa katika mchezo wa kwanza pia kuwania nafasi hiyo.