Ronaldo akimbia waandishi mahakamani

Nyota wa timu ya taifa ya Ureno na Real Madrid ya nchini Hispania, Cristiano Ronaldo amevikwepa vyombo vya habari baada ya kuwasili mahakamani kwa mara ya kwanza hii leo.

Ronaldo anayekabiliwa na tuhuma za kukwepa kulipa mamilioni ya fedha kwaajili ya kodi amefika mahakamani hapo huku akikataa kuzungumza na vyombo vya habari.

Cristiano Ronaldo, ambaye anakanusha kutennda kosa lolote alitarajiwa kutoa taarifa baada ya kuhudhuria kesi katika mahakama huko Pozuelo de Alarcon mahala ambapo ndipo anapoishi.

Lakini mara baada ya kuwepo mahakamani hapo aliamua kutozungumza chochote na waandishi baada ya kikao chao kilichodumu kwa takribani dakika 90 na wakili wa kampuni yake, Inaki Torres akizungumza kwa niaba yake amesistiza kuwa “ Kila kitu kipo chini ya uangalizi”.

Waendesha mashitaka wanasema Ronaldo mwenye umri wa miaka 32, anashutumiwa kukwepa kodi yenye thamani ya Euro milioni 14.7 ikitokana na haki ya matangazo kunako mwaka 2011 na 2014.

Endapo mshindi huyo mara nne wa Ballon d’Or atakutwa na hatia katika kesi hiyo inayo mkabili atalazimika kulipa faini ya Euro milioni 28 na kifungo cha miaka mitatu na nusu jela.