Jonas Mkude awekwa kando

Kiungo wa Simba Jonas Mkude ambaye alikuwa Nohodha wa klabu hiyo leo amewekwa kando na kuwa mchezaji wa kawaida wa Simba huku nafasi yake ikichukuliwa na beki wa Kimataifa raia wa Zimbabwe Method Mwanjale.

Kiungo wa Simba, Jonas Mkude.

Mabadiliko hayo ya Simba yametangazwa na Mkuu wa Idara ya Habari ya Simba, Haji Manara na kusema kuwa benchi la fundi la klabu ya Simba chini ya Kocha Mkuu Joseph Omog ndiyo wamefanya mabadiliko hayo wakiwa na lengo la kuboresha kikosi hicho.

"Benchi la ufundi la klabu ya Simba,chini ya kocha wake mkuu Joseph Omog limefanya marekebisho kwenye eneo la unahodha wa timu. Katika marekebisho hayo yaliyoridhiwa na uongozi wa klabu, beki wa kimataifa Mzimbabwe Method Mwanjale ameteuliwa kuwa nahodha mpya wa timu ya Simba, akichukua nafasi ya Jonas Mkude atakaendelea kuwa mchezaji mwandamizi kwenye kikosi" alisema Haji Manara 

Aidha klabu hiyo ya Simba imefanya mabadiliko mengine kwa kuwateua wachezaji bora wa Ligi Kuu ya Tanzania kuwa manahodha wasaidizi wa timu hiyo.

"Kwenye mabadiliko hayo ya kawaida, benchi la ufundi pia limewateua Mchezaji bora wa ligi kuu ya Tanzania na klabu ya Simba kwa msimu huu, Mohammed Hussein(Tshabalala) na John Raphael Boko kuwa manahodha wasaidizi wa timu hiyo." aliongeza Haji Manara 

Klabu ya Simba ipo nchini Afrika Kusini kwa ajili ya maandalizi ya msimu ujao wa Ligi Kuu bara 2017/2018 lakini kikosi hicho kinatarajiwa kurejea nchini siku za karibuni kwa ajili ya bonanza la Simba Day ambalo litafanyika tarehe 8 mwezi wa 8 mwaka huu.