Man U kumsajili Bale?

Gareth Bale

Manchester United iko karibu kufanikisha usajili wa mshambuliaji wa Real Madrid na timu ya Taifa ya Wales Gareth Bale kutua klabuni kwao.

Hatua hiyo imefikiwa kutokana na kauli iliyotolewa na Kocha Mkuu wa Real Madrid Zinedine Zidane kuwa  "lolote linaweza kutokea" kabla ya dirisha la usajili kufungwa ifikapo Agosti 31 mwaka huu.

United huko nyuma ilishindwa kumpata mshambuliaji huyo. Ikiwa chini ya "Sir" Alex Ferguson ilimkosa Bale wakati anatoka Southampton na kuhamia Tottenham.

Na mabingwa hao mara 13 wa Ligi Kuu England walishindwa tena kukamilisha usajili wa nyota huyo mwaka 2013 alipoondoka Spurs na kutua Real Madrid.

Vyombo mbalimbali jana Ijumaa vimeandika kuwa United inajiandaa kukamilisha uhamisho wa mshambuliaji huyo.

Gazeti la The Mirror limesema kuwa Jose Mourinho anakaribia kumsajili mchezaji mzoefu na kumtaja Bale ndiye chaguo namba moja, huku Daily Mail limeongeza kuwa Bale atauzwa na sehemu ya fedha zitakazopatikana zitaisaidia klabu hiyo kumnunua straika wa Monaco  Kylian Mbappe.

Dau ambalo Mbappe raia wa Ufaransa anatarajiwa kuuzwa ni pauni milioni 160.